السلام عليكم ورحمة الله وبركاته
صباح الخير أو مساء الخير للجميع وخاصة الحجاج ..

(وكل عـــــام وانتم بخيـــــــــر)

في البداية أحب ابارك للحجاج اللي أول مره يحجون .. تأدية الركن الخامس من أركان الاسلام .. تقبل الله منا ومنهم صالح الأعمال ..

واللي ماحج احب اوصيهم بالوصايا التاليه ..

1-اجعل النية صادقة لله سبحانه وتعالى بإداء هذه الفريضه دون رياء أو سمعة .. يعني لاتحج على شان فلان حج والا على شان يقولون انك حجيت وتنسى انها فريضه واجبة على كل مسلم ..

2-اختر الحملة المناسبة اللي بتروح معهم وحاول تأخذ معلومات كافيه قبل تغامر في أي حملة ..
مو مجرد ما إنك تشوف اعلانها تشترك معهم .. لا .. اسأل اللي حولك واللي قد راحوا بحملات واعجبتهم .. وشوف اللي يعجبك منها من ناحية المميزات ومن ناحية الأسعار ثم توكل على الله .

3-اختر الوسيلة اللي ترتاح لها .. طبعا بالطيارة او بالسيارة مافيه غيرها ..واذا كنت متعود تسافر بالطيارة وراعي درجة اولى وحركات وماعمرك ركبت نقل جماعي فخذ نصيحتي وسافر بالطيارة .. لانك راح تتعب في الطريق وخصوصا معك ناس ماتعرفهم شايلين عوائلهم واطفالهم وازعاج وغثا .. فما راح ترتاح.. مجرد ماتوصل للقويعية تقول رجعوني الله يرحم والديكم ..
اما اللي متعود فماعليه خلاف لو يركب سيكل ..


4-اختر الاشخاص اللي بتسافر معهم بحيث يكونون افضل منك على اقل تقدير ( من ناحية الالتزام اقصد ) لانهم بيعينونك على فعل الخير ويشجعونك على اداء هذه الفريضه على أكمل وجه .. بالعربي خوياك اللي في الاستراحه حقين الشكشكه والوناسه لاتاخذهم .. ( منت رايح سوريا )



5-اللي بياخذ اهله معه امه وخواته مثلا .. يشوف له واحد من اخوانه يعاونه .. يعني ماله داعي تسوي نفسك قوي وانك تقدر تحججهم بلحالك .. وراك زحمة وعالم ماتدري وش الحج طايحين في الناس مصاقط ومزاحم على غير سنع .. وماتدري يمكن يصير لك شي والا تضيع .. وتوهق اهلك معك .. المهم انك تضرب اسوأ الاحتمالات على شان تحج وانت مرتاح ..


6-جهز شنطتك واغراضك كاملة ولاتنسى الحرام ( وجه كاتم الضحك) واخذ معك مصحف صغير وسجادة .. واذا انت ناسي تفاصيل الحج خذلك كتيب صغير واقعد اقرا فيه .. من باب استرجاع اللي درسته في المتوسط عن كيفية اداء الحج .



7-مثل ماتعرف انواع الحج ثلاثة ( متمتع – قارن – مفرد ) لابد تنوي لواحد من هالانواع عند الميقات ..وبامكانك ترجع للكتب اللي تتكلم عن صفة الحج اللي فصلت في الانواع الثلاثة .. وتختار واحد منها ..واذا اشكل عليك شي او عندك سؤال فالمشايخ واجد في منى وفي عرفه اسأل أي واحد منهم وبيفتيك .. يعني لاتشيل هم منت في خلا ..




8-اذا وصلت لمنى بارك الله فيك .. توجه لربك وادع لنفسك ولاهلك وللي يعزون عليك ( لاتخلي أحد ماتدعي له بالصلاح وبالهداية ولاتنسى اخوانك المجاهدين في العراق وفي الشيشان ) واكثر من قراءة القرآن ومن التسبيح والتهليل وقيام الليل .. واذا جاء ليلة عرفة ( الوقفة ) نام بدري لان وراك يوم عضيم وهو يوم عرفة يبي لك تضاعف الجهد فيه وتلجأ لرب السماوات والأرض وتدعيه بالمغفرة والتوبه ولاتنسى والدينك من الدعاء وادع الله ان يرزقك برهم والاحسان اليهم ..



9-بعد انتهاء يوم عرفة يلزمك المبيت في مزدلفة .. وهذي سنة الرسول صلى الله عليه وسلم .. فلابد تنام في مزدلفة لاتقول ابقرا قرآن أو اصلي .. الأفضل من هذا كله المبيت اقتداء بسنة النبي صلى الله عليه وسلم ..



10- اذا طلع فجر العاشر من ذي الحجة توجه إلى منى .. واذبح ضحيتك ثم رح حلق راسك على الموس وعيد مع المسلمين .. وصدقني راح تحس انه افضل عيد مر في حياتك وقول رمس الرياض ماقال .. ثم ابدا برمي الجمار .. لكن قبل ماتبدأ اختر الوقت المناسب خصوصا اذا كان معك عوائل .. وحاول تساعد اهلك في اختيار الجمرات .. كما ورد في السنة ان حجمها ( اصغر من حبة الفول واكبر من حبة الحمص ) مو تاخذ بلكه والا تجمع السبعه مع بعض وترميها مره وحده .. انتبه !
على طاري رمي الجمار .. مرة رحت ابرمي الجمرات والقا صعيدي بوسط العالم شايل زنوبته وانتم بكرامه يبي يرجم ابليس .. يقول دنتا ابن كلب .. انت اللي طلئت قوزتي وحرمت اخويا من الورث .. وخربت بيتي .. مسكوة اللي حوله قالوله مايجوز ترمي بهذي .. قال ايه .. دا بالقزمه الأديمه يترمي .. هو صادق بس نتبع السنه حتى نكسب اجر الحج وهو كما ورد في الحديث ( من حج فلم يرفث ولم يفسق رجع من ذنوبة كيوم ولدته أمه ) فالحج اجره عضيم .. وأدائه سهل وممتع .. وجوه جو رحماني لايمكن ان تسناه ماحييت ..


11-نسيت اقول للحجاج .. لاتنسون اخوانكم في منتدى الحب من الدعاء الخالص .. لصاحب الموقع ولمديره وللمشرفه العامه (النجديه) شافاها الله وللمراقبين ومشرفي الأقسام وحنا الاعضاء لاتنسونا من الدعاء بالهداية والصلاح وطاعة الرحمان وبر الوالدين وكل دعاء ينفعنا في الدنيا والآخره ..

وبعد لاتنسون تجيبون لنا هدايا .. ( أنا ابي الكميره هذيك اللي داخلها صور )

12- واذا رجعتوا بالسلامه .. استمروا على طريق الخير وفعل الطاعات والتوبه من الذنوب والسيئات..
وفقكم الله لكل خير .. والسلام عليكم

بارك الله فيك اخى واضم صوطى معك
وانتمنا من الله ان يتقبل حج كل من حج ويرزقنا حيج بيت الله قريب
وندعو معك لكل من دعوت لهم
وندعو لى الاخت النجديه فى هذة الايام الكريمه ان يشفيها الله وترجع لنا بكل خير وصحه

ومشكور اخى كل الشكر
على روحك وموضوعك الاكثر من راءءعين

تحياتى اخى