(ينصح بقراتها قبل النوم,,, واللي مشغول ينقزها للموضوع اللي بعده)
والله قصه تحزن



كنت طالع بالددسن في البر والكلااام هذاا قديم مرة قبل لاينولد جد اكبر واحد فيكم يعني ايام ماكانو ياكلون البردقان والموز بقشرة وكانت الوان الناس ابيض واسود مهوب زي الحين ملونين (قوية أدري ) وكانت الموضة ذااك الوقت الشكشوكة ومن عندة شكشوكة هذاا ولد نعمة محد قده (مثل المفاطيح الحين) المهم كنت ادور بالعراوي حقي( الددسن) ادور بيض حمام او عصافير عشان اودية للبيت واسوي شكشوكة المهم واشوف حاجة غريبة بيضاء مدفونة واقعد يووم كامل احفر فيهاا وبالفعل صار جسم بيضاوي كبير وقلت في نفسي شكلهاا بيضة حمامة طايحة واندفنت وكبرت مع المطر (على نياتي) واخذهاا والله معي للبيت وكل الحارة يحسبون معي خزان فيبرقلاااس وطول الطريق قاعد افكر واقول هذي بتكفيناا شكشوكة لمدة شهرالمهم ، وادحدرهاا في السيب وقلت لاهلي شوفو البيض ولا بلاااه قالت امي الله يخلف على قلبك يالـــدلخ (يعني ماعندك احد) هذي وانا امك كورة الاولين حقت الفراعنة كانو يلعبون بابين واحد عند الاهرامات وواحد في الخرج(منطقة قريبة من الرياض تم العثور على البيضة فيهاا) والله وتمشي علي نصبة امي ... ونتشاقلهاا (نشيلها ) البيضة ونرميها في غرفة السطح ونسافر شهرين..

يوم رجعناا طلعت الشغالة بتنشر الملاابس في السطح (ولم تعلم ماقد خبئة القدر لهاا) والله ومعد شفناهاا وتجي امي وتنادي سوارتي سوارتي (اسم الشغالة) ومااش محد رد طمرت ابشوف وش القصة وادخل السطح بشويش الهواء يهفهف الملاابس بشويش والباب يطلع منة صوت خفيف (يبي لة تزيت) والقى زنوبات سوارتي وفانيلتي العلاقي على الحبل ومابعد حطت القضاب علية الضعيفة وهي مهيب فية .. مشيت بشويش على صووت نفس قوي في الغرفة حقت السطح وادف البااب بشويش واتفاجئ بحيوان غريب بحجم الفيل منسدح على ظهرة ومعة عصاء مكنسة ينضف ضروسة بة(ماكلهاا ) واجيك امشي الطبلوون مع الدرج يمكن نزلته بثلاث خطوات من الراااعه واقعد اشرح لاهلي وش شفت ..!!
قالت أمي بكل برود ..زف فنقر (أي انقلع بالفرنسي) والله واطلعهم ابا اوريهم المنظر وفي دفتي الباب بشويش لايقوم صادفت انة يتثاوب وصار من النوع الي يطلع نار مع فمه واعدم وجهي ابن الحرام ماعت حواجبي وشنبي ونزلنا ركض تقول طلعة مدرسة ونصك الباب ونزلجة ونقعد نفكر من وين جاء هالشي

المهم استسلمناا للامر الواقع وخليناه اليف وصرنا كل يوم نجيب لة مفطح وحناا نتغدى على طحينية وكل يوم يكبر وصعب موضوع تطليعة من السطح وصار يصااارخ واذا قفلت معه طلّع نار من فمه اعدم بيوت الجيراان كلهاا واحرق الحارة ..ويجي ذاك اليوم وجيت ودخلت وادور امي واشوف مصلاهاا ( سجادتهاا ) فاضية واناديهاا وماش ماردت علي واتذكر سوارتي واطلع اركض وادخل علية وانغزة لين ماقال أي وشفت قطعة جلاال امي ناشب في ضروسة واتهايق ساعة اصيح اصيح وادق على ابو سارة وقلت تعال افزع امي راحت في بطن قادزيلااا والله ونحترية ينام الديناصور ويوم نام فرشناا فرشة على لسانة عشان ماتزلق رجليناا وانزل بحبل مع بلعومة وانادي امي وماااش ماترد (صوتي بصدى وصوت نقط موية على شكل بزبوز ينقط في غضارة) واللة واطب على حافة باب المعدة (كني على جال قليب) واولع بالتريك واشوف امي بجلاالهاا منسدحة على الكبدة ( تقول ابرد) وجنبهاا سوارتي حية ترزق وفي يدهاا القضاب قلت يمه وش جابك هنا ووش هو له تطلعين السطح يالله يالله مشينا ..قامت وضفت جلاالهاا وقالت طلعني علية ها السلب (أي الكلب) اوريك فية ..قلت لا لا ذا ماينمزح معه وتقوم سوارتي تبي تطعنه بالقضاااب .. قلت اعصابك لايقلبك صيخ كبااب والله ونطلع ولله الحمد الدينصور نايم المهم والله ويكبر الديناصور (قادزيلاا ) وصار الموضووع معدهوب خروف كل يوم.. صاارت الدعوة تريلاات خرفان كل يوووم ( لابوهاا من شكشوكة) والله ونطفر ونتسلف ونشتري لة ونصير على الحديدة وكل يوم نازل بحبل اطلع واحد من اخواني من بطنة ويتطور موضوعة وصار يتهايق مع السطح ويلقط هنود الحارة والله ويجي ابو سارة بياخذ مني خمسة ريال بيشتري تتن ( دخان ) ترى اخر مره اترجم يووه ، المهم ويرن الجرس ويطل علية ويلقطة ولحسن الحظ صار فية ارسال في بطن قادزيلااا لانة بالع برج جوال علية فلبينين يسوون لة صيانة
ويدق علي وقال تعال انقذني تراناا منقذين شغالتكم ذاك اليوم وانزل لة بحبل والقاء نص اهل منفوحة موجودين الي لاقطة وهو جايب تميس واللي بالعة هو وسيارته ولقيت هندي بدبابة ملبق جنب البنكرياس وباص بنات بس لحسن الحظ بالعة في الليل فاااضي مافيه احد واطلع اناا وابو سارة والعالم تطلب النجدة ( طبعاا كان ودي انزل لهم اساعدهم بس ابو سارة قال لا لا تخيل ينقطع الحبل فيك او يتثاوب وانت في بلعومة وتحترق ) المهم خربهااا قادزيلااا وطب مع جدرا السطح وقاام يركض في شوارع منفوحة ويوطي السيارات واجي قدامة بددسني وافحط واسحب جلنط اعجبة التفت وقعد يناظر العقدة ونسى طريقة ولمخ ( أي صقع ) في منارة مسجد سببت لة ارتجاج وان سدح على ظهرة وبالفعل يلفظ قادزيلااا انفاسة الاخيرة ويلتفت علي واناا جنبة ملبق الددسن في حزة الغروب واشعة الشمس الحمراء على جلدة الاخضر وعيوني في عيونة ومد يدة لي واناا كالنملة عفاف عندة وقاال مشكور يارمووووس على كل الي قدمته لي وسلمني على الوالدة وتعذر لي منهاا كنت احسبهاا طماطة وهي بجلااالهاا الاحمر وساجدة وابوصيك على بيضتي شفهاا في غرفة السطح انتبة لهاا وعيونه غرقانة بالدموع وخشمه يصب دم وقال خل امك تحللني تراني ماكل جريش أم وضحى الي مرسلتة لكم ..