ضاقت اوساع الفيافي والوعد متن السفينة...
للطريق اللي دعاني بامان الله وأمانـــــه.....

لاتناديني وصوني قلبك الله لا يهينه..
لايراهن في رجوعي لاجل مايخسر رهانه..

ليه مارحل عن غرامك بعد ماذقت الغبينه..
اذكري لي شي واحد يستحق اقعد عشانه..

قلب ماحن لوصالي ماني بحاجة حنينه..
وأشهد انه مايعزٌِر بالرفيع ألا هوانه...

الهوى الغدار حد الله مابيني وبينه..
والرجل لاخير فيه ان ماحفظ قدره وصانه..

واحد مثلي اليا من حدته عوجا سنينه..
ماشكى لاقرب بن أدم لو هو أغلى من أخوانه..

يوم قلبي ماعصاك وماقدرتي تذبحينه ..
ليه خنتي فيه وانتي معه بنفس الديانـــه..

كان ذبحي بيدك ارحم من اللي تفعلينه..
وإن طلبتك تذبحيني ماذبحتيني لعانه..

كل جرح من جروح تذكرينه تنكرينه ..
كن مالك في نزيفه يد خانت بالامانه..

ينزف الخافق تواضع لين لطختي جبينه ..
وإلا ماكنت ابيها توصل لحد الأهانــــــه..

قلت من باب الميانه صاحبك وتعذبينه..
لعنبوك أرخي معاي شوي ماصارت ميانه..

طعت عقلك يوم قيل ان العقل بالبنت زينه..
لكن الشرهه علي كنت احسب انك تكانه ..

من بعد ماكنتي انتي في حشاي أغلى سجينه..
باوعدك بطلق سراحك وأتهمني بالأدانـــــه..

وين رايح ؟؟..لاي درب مايرجع للمدينه..
ليه رايح ؟؟..لان قلبك ماترك قلبي وشانه..

كيف ابنسى ربي اللي ملهم القلب السكينه ..
مثل ماعانى بقربك لانوى فرقاك عانه..

كان قاسي يجرح أطراف السكاكين السنينه..
مايطيح وبنت مثلك حبها هزت كيانـــــــــه....

وألا انا خابر خفوقي مايمد الا الثمينه..
وأن بغى يغيض الثريا قعدّ القمره وزانه..

مزعل لاجلك هنوف رجت عقول رزينه..
وأن تهادت بالطريق الجرهدي تزهر جنانه..

جادل كن الجمال قبالها كتف ايدينه..
والقمر لوشاورت له ينزاح وتقعد مكانه..

كانت اول من تحكم في فروع الياسمينه..
وأن تعدتهن تثنن خيزارنه ..خيزارنه...

بعتها لاجلك وصارت لـ اصغر اطرافك رهينه..
وألاهي لفتة هدبها تغمرك ثقل ورزانه...

والخفوق اللي تغذى من معزة والدينه..
مشكلته انه تعلق في زمن ماهو زمانه..

كل مازادت جراحه واكتشف غلطة ضنينه..
صدقيه أن قال مابه شخص يستاهل حنانه..

يوم نادى يافـــلانه ..........مارضيتي تسمعينه..
لين صوت ..يافلانه ..يافلانه..يافلانــــــــــــــه..

كنت اشوفك زعفرانه تقرض الورد وتدينه..
يمكن اني ماقطفتك بس اشوفك زعفرانـــه..

كنت اهاب البعد عنك واطلبك لا تذكرينه..
كان خوف من الفراق وخطوة الفرقا جبانه..

ماقتنعت ان الخيانه للرجل تلوي يمينه..
لين ماربي بعثك وذقت من طعم الخيانه..

اسمحي لي مابقى فيني مكان تطعنينه..
واقبلي من جوف قلبي كل عطفه وامتنانه..

والله الله في عذابك بتركك عينك بعينه..
دلليه ويرّده عن شقاك الا لسانـــــــه...

والا أنا قررت أسافر وامتطي ظهر السفينــــه......
لان مابه شي واحد يستحق اقعد عشانــــــــــــه...........


للشاعر / حامد زيد قصيدة فعلا رائعة ..
تحياتي
شجون الــــــــــورد

تسلم اخوي راعي الاولـــــــــــــــــــــه..
يكفيني فوح عطرك بمرورك وردك....
شاكرة لك كل الشكر ... تقبل فائق تحياااتي


شجــــــــــــون الـــــــــــــــــــورد

مرحبااااااااااااا يا شجون

ابداع دايم من الشاعر حامد زيد

صح الله لسانه وتسلمين يا شجون على االاختيار الطيب

وتقبلي تحيااااااااااااااااتي

سلمت ..اخوي خالــــــــــــــــــــــــد..
أدام الله السعد في حياتك ..
شاكرة لك كل الشكر .....
تحياتي
شجــــــــون الورد

شجون

اختيار جدا موفق

تمنياتي لك بدوام الصحه

واتمنى اشوف لك كتابات في المنتدى باسمك

اخوك

حياك أخوي ... سعد ...
أدام الله العافية على قلبك ..
ولك ماتتمنى قريبا أن شاءالله ..
لك مني كل التقدير والاحترام ..............
شجون ا لورد