$ 5 $
الصدر ضاق وحاير الدمـع دفـاق
من ناظر(ن) من حاير الدمع مرهوق
دمع تكبه عيـن عاشـق ومشتـاق
ارعد سماها بالغضب ومطر الموق
الا سفح من فوق الاوجان وانسـاق
يسيل منه معيلـت مرتـع النـوق
محدن رحمني يوم الاقـدار غـراق
منجور دمعـاتٍ تكسـر بصنـدوق
صدر من الفرقاء رمع فيـه دقـاق
ووجس معاليق الحشا يشعلن فـوق
فاذا بغيت ادلـه تذكـرت الافـراق
طفلا على شل المعاليـق مطفـوق
طفلا نقل بالزين غضات الاعنـاق
عزالله انه طالنـي منـه ملحـوق
في مامضا دنياي جتلـي بالاوفـاق
وردت عددهن قبل ماهوب مطروق
جيت الحبيـب دالـه بالكـرى راق
ومجوهرات امبيسمـه ذقتهـن ذوق
يوم انتبه لي صاحبي بعـد مافـاق
اصبح يعاتبني على الغدر والبـوق
يقـول مامثلـك للجـواد ســراق
ولاانت على هذا من الناس مسبـوق
قلت ارحمو من زاركم ماله ارفـاق
ورووس الافاعي بالقدم حطهن سوق
ماله رفيق وبـه يضيقـن الافـاق
واذا جفيتـو مايبـي كـل مخلـوق
فطلق حجاجه وبدل الوجه بشـراق
وافتر عن بيضاء تكاشف بها اوراق
فنهن سقاني كاس خمـرا بتريـاق
زود على ماصار بالغدر مسـروق
احباب لحباب تعاطـف بالاريـاق
وارواح تحيا بين عاشق ومعشـوق
هو حط ذرعانه لي افراش وارواق
وانا لويت العضـد لمعنقـه طـوق
ثوبه نظيف ولاوطى فيـه عشـاق
وثوب الخنا يجوز به كل منطـوق
$ 6 $
انبيك يامن هو عـن الحـال نشـاد
شف دوك قلبي من محانيـه مفقـود
مشيـت بـدروبٍ عتيقـات وجـداد
ولقيت بيبـان المـوده بهـن كـود
دخلتهن عقب العناء هـو والاجهـاد
وقبلي دخلهن ناظـم الـدرع داؤود
مابين حام وسام جور الهـوى سـاد
في كل قلبٍ شاغل الحـب ماجـود
كـلٍ علـى مـاراد صـادر ووراد
عـدٍ لكـل الخلـق بيّـن ومـارود
الـود قـد هـدّا صليبـيـن الأولاد
البيض تشهد به وتشهد بـه السـود
لي فيه قرّر صافـي الخـد ميعـاد
ودخلت ماميزت للنقـص والـزود
صادفت ملهوف الحشا ظبي الأجراد
طفلٍ عليه من البهـا ستـر وعقـود
طفلٍ نفل بالزين غضـات الأنهـاد
به سحر هاروتٍ وماروت منضـود
له قلت راع لحالتي يابـن الأجـواد
ارفق على قلبٍ من الحب مضهـود
لجلج بسودٍ طرفهـن للحشـا جـاد
وادي فؤادي عقبهن تقـل مجـرود
وخلاني اجرع بالهوى كـل ماكـاد
كني بوسط الموج تلعب بـي النـود
ونيت من كود العنـا عقـب ماكـاد
ونة خالوجـيٍ علـى جلـد مفـرود
ماينفـع العشـاق ترديـد الأوجـاد
ان شاف من غاليه ميلات وصـدود
من عقب فقده حاربت عينـي الـزاد
وعيني لها عن لذة النـوم راصـود
بغيت اجيب اسمه على روس الأشهاد
لولاه يلحقني مـن النـاس منقـود
انا ونفسـي عقـب فرقـاه بجهـاد
واغضي وكن بناضري يرتكز عود
صبرت واثر الصبر يرّث بالاكبـاد
وخلا فؤادي خافـق القلـب ملهـود
فرقا لطيف الـروح لاعـاد لاعـاد
القلب من فرقاه يرعـى بـه الـدود
يازبن قلبي فيه جـور الهـوى زاد
كنه بما جاء قيس يازبـن موعـود
من غـاب عنـي ماتهنيـت برقـاد
قلبي لقلب مغيـزل العيـن مشـدود
يمشي معه يازبن فـي كـل مـاراد
ماله عن الغالي محاريف وصـدود
لو ان قلبي من صليب الصخر بـاد
ومن المحبه صار به كسـر ولهـود
يازبن شفت الكود من جور الأنكـاد
وحبٍ دخلت احماه حبٍ بـلا حـدود
الله يذكـر مـن فقدنـاه بـجمـاد
وانك تلـم الشمـل ياخيـر معبـود
$ 7 $
حل الرحيل وفرقوا شمل الاحبـاب
ناس على فرقـا الاحبـه مغاليـل
غدى لهم مع طلعة الشمس ضبضاب
وسالت دموع العين مثـل الهمايـل
وقفت اراعي سيد تلعات الارقـاب
واغضي وهو يغضي بسود مظاليل
بشفاه يظهـر ماتخفـى بالالبـاب
وبشفاي افصل له عن الحال تفصيل
اسرار ودٍ بين صايـب ومنصـاب
نجوى لها باقصى الضماير مداهيل
سرايرٍ تنساب من تحـت الاجيـاب
لصدورٍ اطهر من قراح الشهاليـل
روحي على حبه لهـا كـم جـذاب
ويتل قلبي عذب الانيـاب بالحيـل
لوان حبه يطعـن القلـب باحـراب
ابرى ليا شميـت بيـضٍ معاسيـل
على نقـا مانـي بغـادر وكسـاب
وبالعرض والله ماندور محاصيـل
ماني بمن يجرح عشيره بالاسبـاب
ويحط له مع كـل ريـعٍ محابيـل
بس الحديث وقرعة النـاب بالنـاب
واظهار مكنـون الغـلا والتعاليـل
عزي لمن مثلي من الحب منصـاب
تارد عليه همـوم قلبـه زعاجيـل
اليا رقـا مرقـاب نـاداه مرقـاب
بمفارق الخـلان شـاف الغرابيـل
الله لايجـزي عريبيـن الانسـاب
لو هم على ماقيل سوٍ علـى الخيـل
الي سعوا بافراق وضاح الانيـاب
وخلوني اجزع من عنا الغبن واشيل
فرقا ومنها القلب وسط الحشـا ذاب
وعسى هل الفرقا لهم صافي الويـل
عسى يصادفهم من الغيـث سكـاب
وبله غضب مابيه يمطر لهم سيـل
ابيه يجدع مثـل قـلات الاطـواب
منها البرد ينمـاز كبـر المخاليـل
وصواعقٍ منهـا المواليـد شيـاب
والحي منهم ذاهـل العقـل بهليـل
بامر الكريم ومن ترجـاه ماخـاب
يمطر عليهم مثل ماجا هـل الفيـل
الا لطيف الروح يذريـه بحجـاب
كنه براس الطور وهمْه ورى النيل
ويرجع علينا جادلٍ يزها الاسـلاب
من خلقته مانيش عرضه ولا قيـل
بـه مايعيبـه للبعيديـن واقـراب
حاشا ولا تلقـى عليـه المداخيـل
نقي عرض ولا عشق كل نصـاب
الجوهر الغالـي رفيـع المناويـل
وانا يصارحني بلا سـر وكتـاب
وعن حالته يشرح لي العدل والميل
هرجه على قلبي كما الشهد ينـذاب
وقلبي على قلبـه يـرد المراسيـل
كنه بعيني لو غضب كـل عتـاب
بدرٍ تعلى كوكب الجـدي وسهيـل
طفلٍ سلب مكنون عقلـي والالبـاب
عليه اجـاوب نايحـات البلابيـل
ياشطون قلبي زجي السـر بكتـاب
مني لابو غشـام زبـن المشاكيـل
قولي رفيقه من هوى الزين ماتـاب
ويرجيه رجو البدو وبل المخاييـل
وبالليل ياقف له عن النوم حـراب
وكنه يلوج بمـوق عينـه سماليـل