حيالله كلن باسمه نظراً لكثـرة الشكاوي اللي وصلتني من قبل ناس مجهولين بدعوى اني مطنش قسم المجتمع وماكأنه موجود أصلا .. وسنة ونص ماعمرك كتبت فيه شي .. فحبيت اشجب هذا الإدعاء بمويضيع اتمنى يحوز على اعجابكم .. هو بيعجبكم دامه في دائرة الحياة الزوجية خابركم تحبون هالسوالف خخخخخخخخخخ حنا نعاني من نقطه وهي (( عنصر التزليب من قبل احد الزوجين )) والنقطه هذي على فكره ممكن تكون من الرجل او المرأه وغالبا من المرأه (( امحق محايده )) -------------------- اول شي بناخذ الرجال ونشوف وش يسوي الرجال يقوم سبع ونص الصبح وفي فمه فار ميت من الخياس ولو تقول له وشو ( سيقنال 2 ) قال :- نادي في المانيا وبعدين من دون صباح الخير والا صباحك عسل ياعسل .. يصيح باعلى صوته وين الفطور واذا خلص من الاكل قال لها اجمل عبارات الحنان (( ترى الفطور وععععع والبيض مااستوى )) مما يعطي زوجته شعور بجمال عش الزوجيه وبعد ثمان ساعات في الدوام يرجع يدربي دمجته للبيت معفن وخايس لو حط وجه حمااار في اباطه فطس مما يؤدي الى اعلان حاله الاستنفار والخطر القصوى في خشم الزوجه ويبداء الزوج برمي عبارات تلميحيه مثل :- اوووووف والله يا انا هلتس من الجوع او والله لو تجيبين لي فيل اني اكله في دقيقه او اااااااااه والله عصافير بطني تصاصي وكلها عبارات غرضها واحد الا وهو (( بيجي الغداء والا قمت وسطرتس )) وبعد ان يفرم الغداء يفصخ ثوبه المصنق وينام بسروال الدفه وفنيله الاصيل وزوجته لابسة احلى لبس عشان تحسسه انها مهتمة بنفسها وانها ماتزوجت عشان تصير طباخة ولكن هي ماتدري ان زوجها معطيها الخامس فلو تلبس فروه ولا فستان فرنسي ؟؟ فهي لن تحرك شعره في احاسيس ذلك المروح وبعد نوم طويل من قبل الزوج اللذي يتخلله كثير من سيمفونيات الشخير اللي كانها سمفونيه عمان آخر الليل يقوم هالخيــشه حول المغرب وعيونه متغفصه كنه متلاكم مع نسيم حميد وتأتي تلك الزوجه وهي ملهوفه لتتبادل اطراف الحديث مع زوجها الرقــيـــق (( ايه هين )) ولكنها تتفاجأ بعباره (( وين الشاهي )) ثــم ترجع لزوجها الفعلي اللي هو (( المطبخ )) وهي متحطمه ذاتيا ونفسيا وجسمانيا وبعد ان يقحن ذلك المروح الشاهي وكأنه اول مره يشوف شاهي يبدأ بتقليب القنوات الفضائيه طبعا اللبنانيه ثم يبدأ بقذف عبارات اشبه بصواريخ الصمود - حقت صدام - يقذفها في مسامع زوجته المسكينه ( جعله المدفـــع ) مثل شوفي ذي الموت الحمر مهوب انا المقرود اللي اعرست عليك او ايييييييه والله ضاعت علينا او وش ذا الجسم اللي يطيح طايره بوينق من السماء مهوب ذا البقره الللي جمبي بعد هذا كله وبكل وقاحه يقول : انا بروح للاستراحه اذا بغيتي شيء لا تدقين علي .. والا والله ما اجيب صامولي (هي ما تبي صامولي هي تبي الرجال اللي في شهر العسل ) اللي اعطاها وعود بانه سوف يحقق امنياتها و و و وفي النهايه تجـــد نفسها بين يدين رجال اسم رجال فقــط ولكن في الحقيقه هو مركى في مقلط الحريم انتظروا الجزء الثاني اللي بنتكلم فيه عن المرأه المسترجله